У Андижонда 200 гектарлик катта ўрмон барпо қилмоқда. Ўз иши қолиб, шоу-бизнес лойиҳасига аралашиб юрган Экология вазирлиги эса бунга бефарқ бўлмоқда.
Аслида бугунги жамиятимизда бундай ҳаракатни сенсация деса ҳам бўлади. Андижон вилояти Асака туманида яшовчи фуқаро Отабек Нуритдинов «Янги ўрмон» лойиҳасини амалга оширишда ёрдам сўраб вазирлик ҳузуридаги қўмитага мурожаат қилган. Экофаол фуқаронинг йирик лойиҳасига Экология, атроф-муҳитни муҳофаза қилиш ва иқлим ўзгариши вазирлиги ҳузуридаги ўрмон хўжалиги агентлиги келгусида хорижий грантлар асосида маблағ ажратилишини айтиб, жавоб хати юборган.
Маълумки, Ўзбекистонда фаоллик кўрсатиб ўз хоҳиши билан ўрмон яратиш таклифини берувчи фуқаролар кўп эмас. Ана шундай маъсулиятли ишни бошлаган асакалик Отабек Нуритдинов бугун молиявий муаммолар қаршисида қолмоқда. Фуқаронинг ташкилотга юборган хатига қачондир маблағ ажратилиши мумкинлиги айтилган жавоб йўлланган. Ташкилот жавоб хатида Отабек Нуритдиновнинг «Янги ўрмон» лойиҳасига қачон ва қанча маблағ ажратилиши юзасидан аниқ маълумот йўқ.
Жавоб хатида «Ўрмон хўжалиги агентлиги томонидан сизнинг таклифингиз қабул қилинди, келгусида грант лойиҳаларини амалга оширишда сизнинг ташаббусларингизни қўллаб-қувватлаш мақсадида хорижий ҳамкорларни йўналтириш чоралари кўрилишини маълум қиламиз ва Ўрмон хўжалиги ҳамкорлигингиз учун миннатдорлик билдиради», дейилади.
«Янги ўрмон» лойиҳасини яратаётган Отабек Нуритдинов эса одатда юзлаб одамлар қиладиган ишни бир оиласи билан амалга ошираётганини, бироқ маблағ масаласи долзарб эканлиги ва вақт бой берилаётганини айтмоқда.
Олий Мажлис Қонунчилик палатаси Экология ва атроф-муҳитни муҳофаза қилиш масалалари қўмитасининг 2024-йил 10 май куни бўлиб ўтган кенгайтирилган йиғилишида Андижон вилоятида Экологик муҳитни яхшилаш мақсадида ҳимоя ўрмонларини (иҳота) барпо этиш учун 12 974,7 млн. сўм ажратилган, лекин ўтган вақт давомида ушбу маблағдан бор йўғи 223.0 млн сўми ишлатилгани айтилган.
Қонунчиликка кўра, ўрмонларни кўпайтириш – Экология, атроф-муҳитни муҳофаза қилиш ва иқлим ўзгариши вазирлигининг устувор вазифаларидан ҳисобланади.
Маълумот учун, Азиз Абдуҳакимов вазирлиги қошидаги туризм қўмитаси 2023 сентябрь ойида қўшиқчилар “фабрикаси” бўлган «X-factor” лойиҳасини қўллаб-қувватлаган. Лойиҳа сўнгида экология ҳақида клип яратилган эди.