Бугунги кунда Ўзбекистонда 2 млн 400 мингдан зиёд уй-жойлар ҳужжатсиз қолмоқда. Бу мамлакатимизлаги жами уй-жойларнинг деярли 30 фоизи муаммоли вазиятда эканлигини англатади. Бу уй-жойларнинг аксари қишлоқ ва чекка туманларга тўғри келади. Тошкент шаҳри ва Тошкент вилоятидаги хонадонларнинг ҳужжатларида муаммо мавжуд эмас. Аксар қишлоқ ва чекка тумандаги хонадонларда мулкка эгалик қилувчи ҳужжатлар йўқ.
«Мисол учун бир қишлоқда 400 минг хонадон бўлса, уларнинг 5 фоизида ҳам ҳуқуқни белгиловчи ҳужжатлар йўқ», – дейди кадастр агентлиги бошқарма бошлиғи Беҳзод Нишонов.
Шунингдек, Ўзбекистон бўйлаб 1 миллиондан зиёд ҳолатларда фуқаролар томонидан ортиқча ер эгаллаб олинган ҳолатлар мавжуд.
Уларнинг ортиқча эгаллаб олган ерлари тақдири нима бўлади? Уларга нисбатан эгалик ҳуқуқини олиш имконияти борми? Бу ҳақида кадастр агентлиги методология ва услубий қўллаб- қувватлаш бошқармаси бошлиғи Беҳзод Нишонов тушунтириш берди.
“Ер участкасига ёки бинога эгалик ҳужжатлари мавжуд, лекин амалдаги фойдаланаётган ер участкаси ҳужжатлардан ортиқ бўлган ҳолатлар ҳам бор. Бу ҳолатлар ҳам 1 миллион 300 мингдан зиёд аниқланган. Бу ҳолатлар ҳам, албатта кўриб чиқилади. Бирон-бир объектга нисбатан қандайдир ҳуқуқни эътироф этишни битта ташкилот ёки битта ходим ҳал қилмайди. Қонунда бунинг кетма-кетлиги белгиланган. Ушбу кетма-кетликка кўра, кадастр агентлиги ўз ўлчов ишлари бўйича маълумотларини киритади. Кейинги босқичда бошқа 15 га яқин вазирлик ва идоралар кўриб чиқиб, ўзларининг тегишли хулосаларини беради. Шундан сўнг бир ойга жамоатчилик муҳокамасига қўйилади. Ундан сўнг адлия вазирлиги томонидан хулосалар тақдим этилиши жараёни бор. Мана шу жараёндан тўлиқ ижобий ўтган уй-жойлар объектлар бўйича кенгашларга маълумот киритилади. Кейинчалик кенгашлар томонидан биноларга эгалик ҳуқуқи ва ерларга ижара ҳуқуқи эътироф этиш ишлари амалга оширилади”, – дейди кадастр агентлиги бошқарма бошлиғи Беҳзод Нишонов.
Маълумот учун, Статистика агентлиги
қайдларига кўра 2024 йилнинг 1 январь ҳолатига республикада кўп квартирали уйлардаги хонадонлар ва якка тартибдаги уйлар сони қарийб 7,5 млн тани ташкил этган.