Шавкат Мирзиёев 6 июль куни Туркий давлатлар ташкилотининг норасмий саммити доирасида Венгрия Бош вазири Виктор Орбан билан учрашув ўтказди. Бу ҳақда Президент матбуот хизмати хабар берди.
Учрашувда икки мамлакатниниг ўзаро товар айирбошлаш ҳажми қарийб икки баробар ошгани ва қўшма лойиҳа ҳамда корхоналар сони кўпаётганлигига урғу берилган. Шунингдек, 30 июндан Тошкент ва Будапешт ўртасида тўғридан-тўғри авиақатновлар тикланганлиги айтиб ўтилган.
«Барча даражаларда фаол мулоқотлар давом этмоқда. Май ойида Тошкент шаҳрида Ҳукуматлараро комиссия йиғилиши ва бизнес форуми самарали ўтказилди. Саноат, фармацевтика, қишлоқ хўжалиги, логистика, қурилиш ва бошқа йўналишларда кооперация лойиҳаларини амалга оширишни жадаллаштиришга алоҳида эътибор қаратилди»,
дейилади хабарда.
Музокаралар вақтида инвестиция лойиҳаларининг янги портфелини тайёрлаш ва жорий йил якунига қадар Қўқон шаҳрида ҳудудлар форумини ўтказиш муҳимлиги таъкидланган.
«Туркий давлатлар ташкилоти ва Европа Иттифоқи доирасидаги ҳамкорликнинг долзарб масалалари юзасидан ҳам фикр алмашилди»,
дейилади хабарда.
Бундан ташқари, Ўзбекистон- Венгрия ўртасида таълим, маданият ва спорт соҳаларидаги ҳамкорлик фаоллашгани айтиб ўтилиб, учрашувда икки мамлакат халқларини яқинлаштиришга қаратилган маданий тадбирларни ўтказиш зарурлиги таъкидланган.